Per la qual nuova tutta la terra fo aliegra, dicendo si conzerà le cosse. E tutti diceva la sua: chi dice el vol meter tempo di mezo, aspetando zente, e lentar le nostre provisione; chi dice el vol vegnir pacifice. Quel che sarà, scriverò poi. El qual araldo zonse qui la serra, a horre ... etc.
     
      Di sier Zorzi Corner, el cavalier, et sier Andrea Griti, provedadori zenerali, date eri a Vicenza. Dil zonzer lhoro lì, et anderano batando a Verona. Nota, andono con lhoro secretarij Zuan Francesco di Benedeti et Alvise di Piero; et avanti si partiseno, oteneno nel consejo di X di aver con lhoro Zuan Piero Stella, qual è nodaro a li auditori nuovi, et olim secretario, fidelissimo. Et cussì oteneno; et andoe con lhoro questo Zuan Piero, fo etiam canzelier a Padoa con sier Andrea Gritti.
     
      Noto. La tansa, qual scuode sier Almorò Donado, oficial a la camera d'imprestidi, a dì 12 scosse ducati 9000; sì che in 3 zorni à scosso ducati 22 milia et 300.
     
      Da poi disnar fo gran consejo, et con 3 consieri solli, et sier Vetor Minoto, cao di 40, in loco di consier; che alias vidi licentiar il gran consejo, per non esser si non tre consieri. Or manchava sier Zuan Mozenigo, sier Lorenzo di Prioli et sier Pollo Pixani, el cavalier, erano amalati. Et fo posto parte, atento il bisogno, elezer de praesenti 3 consieri di là da canal, et possino esser electi quelli poria esser tolti. Ave 65 di no; et fu presa. Et fono electi li consieri: sier Zacharia Dolfim, sier Marco Bolani, sier Francesco Trum, qualli tutti tre erano stati altre fiate; et podestà et capitanio a Crema, che do volte non passò, sier Nicolò da cha' da Pexaro, fo consier in Cypri, quondam sier Bernardo.