Et compito tal cerimonia, montò a cavalo et andò in castello; et era vestito de velludo negro. Da poi, a dì 5 dicto, ad horre septe de note, la majestà sua se partì da Trento con certo numero de cavalli, et vene verso la Valle Sugana. Et el marchese predicto, con certa zente, andò al castello de la Piera, ne la valle de Lagri; et mandò el castelan de dicto castello dal podestà de Roverè, a dimandare el passo per nome de la majestà del re, per andar a Roma. El qual dise, che a questo non era suo officio a risponder; ma che dimandassino la illustrissima Signoria, et quanto quella ordinaria, tanto lui, como servitor, exequiria. Et el castelan replicò, che el predicto podestà dovesse scriver ad essa illustrissima Signoria, et aspecteriano ancora zorni 6 per la risposta. A dì 5 dicto, el signor re, che era venuto in la Valle Sugana, mandò pedoni numero 3000, con certi pochi cavalli, per la montagna sopra li monti de li Septe Comuni, non facendo despiacere ad alguno, solum del manzare et del bevere. Et questo fece sua majestà, como se crede, per sigurarse de quelli loci, perchè lui im persona, a dì 6 ditto, per quanto se affirma, publice, con pochi cavali, ascese dicti monti, et volse veder et considerar, se per quelle vie se potea condure artegliarie et exercito, per descender ne li piani de visentina. Da poi desese in Valle Sugana, et volse veder li passi de bassanese, et asese in Tasino, che sono ville a' confini, subiecte a sua majestà. Et per quelo loco volse etiam veder li passi de feltrim, praesertim de Celazo et Limon; et per zorni tre cerchò dicti passi.