Et poi, a dì 20, a gran consejo, li soi compagni, Fausti, andono tutti davanti a li avogadori, a pregar fosse expedito; e cussì li promeseno di far questa septimana. Tocha il colegio a sier Andrea Trivixan, cavalier, avogador, sier Lunardo Grimani, consier, sier Pollo Querini, cao di 40, sier Francesco da Canal, et sier..., signori di note; et sier Alvise da Molin, consier, non era. Et cussì a dì 19 fo asolto in 4.tia, et ussì di prexon.
     
      A dì dito. Vene letere di Verona et dil provedador Emo. Et come, con missier Zuan Jacomo, doveano andar a veder li passi di Brentonega et Roverè etc.; et coloquij insieme. Item, li fanti yspani fanno gran danni lì in veronese.
     
      Di Vicenza. Come sier Zorzi Corner, el cavalier, et sier Andrea Gritti, provedadori, zonti lì a dì ..., feno chiamar quelli citadini, a li qual li disseno la bona voluntà di la Signoria nostra, et le gajarde provisione fate, et non dubitasseno di nulla. Et quelli deputati ringrationo la illustrissima Signoria nostra; et alia. Item, poi vene di butar di le tessere tra lhoro, et tochò al Gritti andar in veronese, e cussì andava; e lui Corner anderia in vicentina a sopra veder li passi etc.
     
      [1508 02 17]A dì 17. Da poi disnar fo colegio di le aque. Item, li creditori dil banco di Agustini si reduseno in chiesia di San Zuane a Rialto, a petizion di capi, qualli disseno, come a dì 13 sier Sabastian Zustignan, el cavalier, presentò in colegio il diamante di charati 23, im ponta, bellissima zoja, poteno aver ducati 22 milia da papa Julio a Bologna, e li Agustini ne voleano 40 milia; fo di uno soldan.