El qual fo posto in la procuratia, con certa ubligatione di alcuni danari dia aver uno ferarese, fo fiol dil signor Sigismondo, suso, qual à perhò altre zoje e una possession etc. Item, che li Agustini voriano salvo conduto, e lhoro non l'anno voluto far; e sono in li Servi. Et questi capi voleano elezer per scurtinio altri X a presso di lhoro, per non aver briga convochar tanti: fonno numero 80; et a questo fo contradito, et 0 fato. Si fa li extrati etc.; chi dice sarano boni danari, chi dice si arà bota.
     
      [1508 02 18]A dì 18. Fo consejo di X, pur con 3 consieri. [299] Et, dicitur, fo leto li processi di quelli presonieri ladri, poi si expedirano.
     
      [1508 02 19]A dì 19. Fo pregadi. Et leto le infrascripte lettere:
     
      Di Spagna, di Andrea Rosso, secretario, date a Burgos, di 23 zener. Come il re aria voluto le nostre galie fosseno andate a Mazagibir, zoè quelle di Barbaria; et coloquij col cayto di le Donzele zercha questo; et prega la Signoria fazi andarle. Item, dil zonzer oratori di madama Margarita, è al governo di Bergogna. Avisa di le noze dil duca Carlo in la fia dil re d'Ingalterra; et di questo il re si à dolto, per esser stà fate senza so saputa, ni di la madre, soa fiola. Item, il re manda oratori in Ingaltera per le noze di soa fiola, che fo maridà nel fiol di quel re, et è lì in Ingaltera; la qual il 2.° fiol l'à voluta per moglie. Et cussì è stà dispensà le noze, et li manda, per letere di cambio in zenoesi, ducati 60 milia per resto di la dota che 'l dovea dar etc. Item, il re si duol di queste novità dil re di romani, et scrive a Roma, al papa, voglij proveder a questo, come capo di la christianità; e che 'l vengi, volendo, a incoronarse pacifice etc.