[1508 02 24]A dì 24. Fo consejo di X simplice, per spazar li presonieri di ladri robò le galie di Baruto, numero 22, è im prexom, et è menati per sier Andrea Trivixan, el cavalier, avogador di comun.
     
      La matina fo letere di Cividal di Bellun, di sier Alvixe Dolfim, podestà et capitanio. Di certa villa depredata per todeschi, ut in litteris; il sumario di la qual scriverò poi. Vol 300 provisionati.
     
      El colegio ateseno a spazar contestabili, e far provisionati et zente più poleno; et ozi matina spazono uno Romeo di Pepoli di Bologna, con provisionati 600 et 25 balestrieri e altri. Item, si atende a scuoder la tansa per sier Almorò Donado, oficial a la camera d'imprestidi, licet il tempo di 20 dil mexe sia passato; et fin qui à scosso ducati ...
     
      In questo consejo di X fono expediti li ladri robono, et volseno robar le galie, ut supra, videlicet: quelli do scampono in loco sacro di la chiesia di San Marco, qualli meritavano la forcha, che siano remessi in ditta chiesia et custoditi etc.; do che fonno trovati in le galie, siano apichati a la doana di mar, altri tajà le man, altri im presom, altri banditi di Venecia, ut in processu. Et di li scrivani, uno, Berengo, bandizà al confin di ladri, qual è absente; l'altro, Matio di Colti, per anni X di Venecia etc., ut in condemnationibus. Et cussì a dì 26 dito fo excequita la dita justicia.
     
      Gionse de qui sier Marcho Bragadim, stato soracomito di galia sotil, vien a disarmar. El qual era [306] stato alcuni dì a Pyran, di comandamento di la Signoria, per queste occorentie presente per le cosse di Trieste; ma, visto che il capitanio di le galie bastarde, sier Zacharia Loredan, non havia scontrato l'hordine li fo mandà, che etiam lui e la conserva restasse, et vene di longo a Venetia, etiam per colegio a questo soracomito fo scrito venisse a disarmar.