Item, che il re era a campo a Butistagno; e li havia dà una bataglia, et lui medemo treva le bombarde. Item, di quel contestabile Malfato, qual è padoan, et fo mandato lì versso Cadore per nostri con 60 fanti, e teniva uno passo di la Chiusa, mia 5 di là di Cadore; qual, vedendossi venir todeschi adosso, etiam che i se calavano di monti, dubitando esser messo di mezo, si reculò et vene per tenir uno altro passo di qua di Cadore etc. Item, avisa esso podestà di Cividal, che in quel dì, a dì 24, hore 3 di note, era zonto lì il signor Bortolo d'Alviano, vien di Bassan, batando con 5 cavalli, venuto per stafeta, et era partito e andato a la Gardona, ch'è uno passo, e le zente soe veniva driedo. Item, si have, pre' Lucha, orator cesareo, veniva qui, et era zonto in certo locho, al Ponte, sul nostro.
     
      Fo mandato quelli di le raxon vechie zoso, a far preparar a San Zorzi per ditto orator; et si vedrà quello vorà dir.
     
      Di sier Zorzi Corner, el cavalier, più letere. Come, inteso la nova di Cadore, veniva batando versso Cividal, et scrive di locho in locho, sì che subito saria lì. Et le zente tutte veniva, havendo lassà forniti i passi di vicentina; et rimarà lì il provedador Valier, capitanio di Vicenza.
     
      Di Udene. Come, inteso di Cadore, domino Hironimo Sovergnan et Francesco Sbroiavacha e altri castelani, con 4000 persone, erano partiti per la volta di la Cargna, per andar versso todeschi et ajutar Butistagno etc. Item, aricorda che saria bon far uno provedador a Cividal di Friul. Item, a Goricia si aspectava la persona dil re e zente.