Sier Lorenzo Sagredo, fo castelan a Otranto, quondam sier Alban.
      Sier Zorzi Simitecolo, fo soracomito, quondam sier Zuanne.
      Sier Zorzi Trivixam, fo soracomito, quondam sier Andrea.
      Sier Marco Gradenigo, fo soracomito, quondam sier Justo.
     
      In questo zorno a doana fo apichato quelli do, robono le galie di Baruto. Item, cavà a tre li ochij etc., per diliberation dil consejo di X. Li do fonno messi in chiesia, scampono la note via; hanno taja chi li prende etc.
     
      In questa sera fu fata a San Canzian im Biri una comedia vilanescha, zoè representada, et fo bella. Et eri sera fu fata la comedia dil Truculento di Plauto; fo assa' zente e feno ben. È da saper, sier Anzolo Trivixan, cao di X, et sier Zacharia Dolfim, consier, aceptono la execution di le parte, et si exercitono.
     
      [1508 02 27]A dì 27, domenega. La matina messe bancho sier Hironimo Contarini, provedador di l'armada, et sier Zuan di Prioli, soracommito. Item, sier Marco Loredam, capitanio di le galie grosse, et sier Francesco Contarini, soracomito di l'altra galia grossa. Et questi subito scrisseno li homeni, vien atesi ad armarle, voleno mandarle a Trieste a tuorla; et a l'arsenal si atende la expedition e lavorono tutto ozi; et li homeni di ditte galie sono zà scriti.
     
      [312] Vene più letere. Prima di Cividal, dil bon cuor di l'Alviano, qual vol omnino investirli et romperli, nè si dubita altro, salvo che non li aspeterà. Item, dil Corner, provedador, più letere. Dil zonzer suo lì a Cividal; vene la sera. Item, che Bustignano si teniva, pur il campo li era intorno.