Fo expedito le galie grosse dil tutto, a la qual expedition era sier Anzolo Trivixan et sier Zacharia Dolfim. Et fono chargati do canoni e do colobrine, per Cividal e campo.
     
      Et a horre 3 di note zonse letere di le poste, dil Corner, provedador zeneral, date a Cao di Ponte, ozi, a horre 14. Manda letera auta dal signor Bortolo d'Alviano, di horre 10, è di sopra. Come lo avisa, per il tempo chativo e dato a neve, per ozi non pol far 0; e cussì à 'visato il Sovergnan. Item, par che todeschi s'ingrossano; e li è zonto 600 fanti; et fano repari in la Piove di legname etc. Item, che omnino la matina sequente farà fati; e che 'l provedador atendi a penzer le zente avanti, et si atendi a le vituarie.
     
      [1508 03 03]A dì 2 marzo. La matina in colegio fo mandato per pre' Lucha, orator cesareo, et ditoli la risposta fatali col senato; et chome era expedito, et saria acompagnato per la via di veronese versso Trento. El qual disse poi alcune parole, dolendossi non haver potuto quietar le cosse; et fo acompagnato a la barcha con do savij ai ordeni e li so secretarij.
     
      Vene l'orator di Spagna, col qual fo comunichato quanto si havia risposto col senato
     
      Vene l'orator di Franza, al qual etiam fo comunichato il tutto. El qual orator, insieme con monsignor de ..., orator dil gran maistro di Milan, ogni matina vien in colegio.
     
      Da poi disnar fo il zuoba di la chaza. Fato la chaza, justa il solito, su la piaza di San Marco; ma tutti stava in aspetation di saper, che ozi siano stati a le mano. Fo il principe de more a veder, con li oratori Franza, Spagna, Milan, Ferara.