Et per colegio li fo scripto, erano contenti.
     
      Da poi disnar fo pregadi. Et sopra vene letere dil Corner, di la Piove, di hore una di note. Avisa il zonzer lì; e aver visto a Valle il locho dil conflito, corpi si spogliavano fin qui 1100, era neve e sangue. E zonto in la Piove, mandò il trombeta a la rocha (a dir si rendesse) il signor Bortolo; qual non volse risponder. E iterum mandato, disseno voler dar le chiave al suo capitanio, qual si tien sia stà morto in la pugna. Item, esso provedador à fato comandamento a sier Piero Gisi, era capitanio lì, qual li vene davanti, si vengi a presentar a li excellentissimi capi dil consejo di X. Atendeno le artilarie dimandate per bombardar la rocha; in la qual, si dice, pol esser fanti zercha 80 todeschi. Item, quelli ch'è fuziti al monte, li hanno tolti li passi. Item, che li Savergnani, havendo auto il passo di Tre Ponti, gionseno horre do poi la pugna. Esso provedador etiam ricomanda, per il signor Bortolo, domino Piero Querini, li sia fato gratia dil bando; et à promesso pagar li cavalli morti, et a li stratioti il ducato per testa, come li promisse. Item, col Savergnan era domino Antonio di Pij, li qual veneno lì poi in la Piove.
     
      Di sier Zorzi Emo et sier Andrea Griti, provedadori zenerali, date a Gusolengo, a dì 2, hore ... Avisa aver hauto la nova di Roverè, i nimici esser atorno Castel Barcho, et che quello bombardano; et benché dentro vi sia do contestabeli, con 60 fanti per uno, nominati Matio dal Torazo et Hironimo da Vicenza, oltra il castelan primo vi era, tamen hanno terminà, co l'illustrissimo capitanio, di andar, esso capitanio et lui Emo, fino a Seravalle, la matina, con ... cavali lizieri et ... fanti a sopraveder.