Et questo l'ànno per fanti venuti lì.
     
      Da Gusolengo, di sier Zorzi Emo, provedador zeneral, di 3, da matina. Come, inteso la nova di todeschi esser a campo a Castel Barcho, era subito montato a cavallo con 250 cavali lizieri, e il conte di Pitiano, capitanio zeneral, et 500 provisionati, et vano versso Seravalle a sopraveder le cosse. Etiam scrive con lui sier Andrea Griti, provedador zeneral, che lui resterà lì al suo alozamento, con missier Zuan Jacomo Triulzi et il resto di le zente, per proveder et andar con le zente, achadendo.
     
      Di Verona, di sier Alvise Malipiero, podestà, et sier Francesco Bragadim, capitanio, più letere. Di provision fate; e altre occorentie.
     
      Di Milam, dil secretario, di 2. Come il gran maistro solicita di mandar 250 lanze et fanti 3000 im parmesana, acciò, bisognando, passino in ajuto nostro. Et si aspeta li sguizari; et altre provision fanno.
     
      Di Vicenza, di sier Piero Barbo, podestà et vice capitanio. Come à per relation, che in Axiago pareva certi todeschi. Item, scrive la cossa dil fem, che quella comunità dona a la Signoria, cara ..., che li è sia richiesti mundasseno in veronese; e li manda.
     
      Di Cadore, di sier Zorzi Corner, el cavalier, provedador zeneral, di 3, hore 21. Come todeschi, sono in rocha, haveano tolto termene zorni 3 a rendersi; et che nostri non haveano le artilarie che aspectavano. Item, che li amazati nel conflito fin qui sono corpi 1500 e più. Item, che stratioti hanno amazati in Zolt da zercha numero 100 todeschi, a li qual esso provedador vol dar il ducato per testa, come li ha promesso, zoè tanta cortesia, acciò questa fama non vadi più oltra.