Sier Piero Antonio Morexini, savio ai ordeni, quondam sier Justo.
      † Sier Francesco Mocenigo, fo a la tavola di l'intrada, quondam sier Piero.
     
      In questo zorno fu fato una festa publicha in cha' Moro a San Zuan Digolado in corte, durò tutta la note, e la mumaria granda andò a le messe grande; et fo recità certa comedia. Fo a le noze di sier Domenego Bragadim, quondam sier Andrea, in la fia quondam sier Vido Morexini.
     
      Se partì in questa sera sier Zacharia Loredan, va provedador in Cadore. Item, la sera sequente, sier Donado da Leze, va provedador a Cividal di Friul.
     
      [1508 03 07]A dì 7, fo il marti di carlevar. Et vidi letere, di sier Zorzi Corner, el cavalier, provedador. Avisa di la rota, esser stà granda, et è letera di 5; et che 'l si parte per andar in Friul. E si resente alquanto, e si doleria aver mal per non potersi operar; e che de li corpi erano stà sepulti 900 e più, e ne manchava a sopelir fino 700 altri, et altri morti da poi, come l'aviserà.
     
      Da poi disnar 0 fu; solum colegio di savij si redusse. E la sera vene letere di sier Zorzi Emo, provedador, di 6, date Alla, horre 20. Come à 'uto aviso e letere di Dionisio di Naldo, è a Brentonega, che li scrive aver sentito bombardar; et che todeschi erano andati a campo a Riva. Item, che lui provedador à scrito al capitanio di le fantarie, vengino lì per consultar; e scrito a le zente, è in veronese col Griti, vengi oltra; e à mandà Gnagni dal Borgo, contestabele, con 300 provisionati a sopraveder fin a Torbole, per veder de intrar in Riva.