Noto: per avanti mandò sier Zacaria Contarini, suo nepote, a Lacise a far butar la fusta e la galia in aqua, e armarla.
     
      Or, intesa questa nova, tutto il colegio, reduti in camera dil principe, zoè parte di consieri e altri, steteno di malla voja, e feno varie cogitatione. Et in quella nocte fo mandà via sier Zuan Moro, capitanio di quella galia e fusta in lago. Item, commesso a li executori, con ogni presteza armino, sier Hironimo Contarini, provedador di l'armada, et sier Zuan di Prioli, va soracomito di l'altra galia. Item, le do galie bastarde erano zà partite, et aspectavano in Histria mandato; dove erano etiam stà retenute ... galie dil trafego, capitanio sier Francesco Arimondo, le qual è in Istria, zonte a dì ... fevrer. Et questo, [343] perchè voleno andar versso Trieste et Fiume, lochi di l'imperador etc.
     
      [1508 03 08]A dì 8. La matina, fo il primo di de XL.ma, gionse letere di Alla, di l'Emo, provedador, di 6, hore 4 di note. Come à 'uto letere di Roverè, di sier Marco di Renier, provedador, che quel zorno lo avisa erano venuti zercha 400 homeni paesani di Ten e Archo, e tolto certe piegore, et fato danno di farine a uno molin, adeo venuta tal letera, tutta la terra si confortoe.
     
      Di sier Andrea Griti, provedador, date a Gusolengo, a dì 6, hore 8 di note. Come, inteso todeschi erano a campo a Riva, lui andava a Lacise per montar in barcha e andar in Riva e far quelle provisiom potrà; e il Triulzi, con le zente, va versso Seravalle, per esser col capitanio zeneral e provedador Emo a coloquij, e far fati.