Di sier Vicenzo Valier, capitanio di Vicenza et provedador, date a la Scala. Avisa aver fato apichar per li ferri di una fanestra uno, che à portà formento in terra todescha, et è stà preso da' nostri.
     
      Di Seravale, di sier Zorzi Corner, el cavalier, provedador. Dil zonzer lì etc. Item, el signor Bortolo, inteso l'honor fatoli di esser governador, ave molto a grato; ma de li ducati 25 milia, li par pochi a la spexa etc.
     
      Da poi disnar fo consejo di X con zonta di danari et colegio. Et vene le infrascripte letere, le qual fonno lete:
     
      Di sier Zorzi Corner, date a Ceneda, a dì 7. Avisa il zonzer lì, et anderà a Conejan, dove farà la mostra a le zente. Et avisa, di la compagnia di Latantio di Bergamo esser schampà zercha 300, ch'è gran cossa, dovendo aver fin 3 zorni la paga, partirse cussì. Questo è signal hanno fato butini grossamente. Item, che è sta' sepulti, di corpi morti in la bataja, in una volta numero 978 et poi 710, che summano 1688, et a presso 100 è stà amazati in Zolt, et anegati bon numero in la Piave, volendo fuzer, i corpi di qual continue vien trovati. Item, che è stà lasati andar vivi da zercha 500; et che in questo numero di morti è stà morto uno capitanio, nominato Sisto ..., qual havia 6 contestabeli con lui, di 300 fanti l'uno; et erano belli corpi di homeni. Item, per le altre letere scrive esso provedador aver dato danari et non sa a chi, e tien certo la Signoria sarà contenta, perchè, havendoli prestà fede in altra mazor cossa, etiam in questo li presterà etc.