Fu posto per i savij, d'acordo, far 3000 provisionati, sotto quelli contestabeli parerà al colegio, e sia mandati in Friul. Fu presa.
     
      Fu posto, per sier Piero Capello, sier Pollo Pixani, cavalier, consieri, sier Alvixe Miani, sier Francesco Barbaro, sier Zorzi Valaresso, cai di 40, sier Hironimo Capello, sier Piero Lando, savij a terra ferma, atento li danni ne fanno in Friul le zente alemane, che sia scripto al provedador nostro zeneral, sier Zorzi Corner, el cavalier, che rompi e toy quello el pol tor et haver, sì Pordenon come altro, tuttavia con segurtà di le cosse nostre etc., ut in parte. Sier Piero Duodo, sier Domenego Trivixam, el cavalier, procurator, sier Andrea Venier, savij dil consejo, et sier Francesco Orio, savio a terra ferma, et sier Zorzi Pixani, dotor, cavalier, che sia scripto fazi simile incursion, ma non a rotura di tuorli castelli etc., ut in parte. Sier Marco Bolani, savio dil consejo, sier Tadio Contarini, savio a terra ferma, messe che si tenisse la praticha di Pordenon e scrivesse. Et sier Lunardo Grimani, savio dil consejo, sollo, de indusiar. Parlò sier Francesco Foscari, el cavalier, primo, contra le parte; poi sier Domenego Morexini, procurator, di anni 90, su la rengeta dove si leze le letere, non vol ste parte, voria che il provedador mandasse da si a dir si retenisse di far sti danni, aliter se li faria etc.; poi sier Hironimo Capello, per la sua parte; poi sier Antonio Trun, procurator, et sier Antonio Loredam, el cavalier, vol l'indusia. Andò le parte: 7 dil Bolani, 27 dil Duodo e compagni, 54 dil Capello e compagni, di romper, 112 dil Grimani de indusiar; e questa fu presa.