Il papa non à voluto, dicendo, li subditi di la Chiesia non vol se impazino. Item, che Frachasso [367] voria venir a soldo di la Signoria, et il cardinal San Severino e lui non cessa. Item, zercha la materia di la liga, il cardinal Narbona li à dito, non bisogna più parlar al papa, perchè el non vol intrar etc. Item, l'orator nostro à ditto, inter loquendum col papa, lievi el legato di Elemagna, che dà reputation; il papa non risponde a verso. Item, il papa feva far guardia a la caxa dil cardinal da Como, stava mal; et soa santità andava a Hostia a piacer.
     
      Fu posto, per li savij, di mandar ducati 6000 a Milan, per dar la paga a li 2000 guasconi etc. Et fu presa.
     
      Et altro non fu fato, et fo licentiato el pregadi.
     
      Noto. A dì 20, al zudega' di petizion, fo spazà la causa dil diamante, che 'l signor Hercules di Este dimandava a sier Sabastian Zustignan, el cavalier, fo vicedomino a Ferara, di Agustini, che li fe' scrito di ducati 17 milia. E fo sententiato ozi, per parte, ducati 2000; et intravene li cappi di creditori dil banco di Agustini. El qual diamante è im procuratia, con la ubligation lui sier Sabastian l'avea.
     
      [1508 03 22]A dì 22. Fo consejo di X con zonta di colegio e altri, et maxime una zonta nova, tra i qual fo sier Beneto Sanudo et sier Zuan Marzello, fo a Chioza, et altri soliti a intrar di zonta.
     
      Di campo. Se intese una nova, come fo scoperto uno tratado di uno capo di spagnoli, qual havia intelligentia con todeschi di la Piera, et li feva saper tutto quello fevano nostri.