Come à nove, il re è a Olmo, dimanda ajuto. Item, arà numero di zente etc.
     
      Di Butistagno, di sier Jacomo Manolesso, di primo. Dil zonzer suo lì, et quello à trovato; et sier Francesco Zane si partì e vien di qui. Item, di zente alemane redute lì vicino, ut supra, et si dice numero 3000. Etiam il podestà di Cividal di Belun scrive.
     
      Di Friul fo leto le letere scrite; il sumario di sopra.
     
      Vene letere, hessendo pregadi suso, di le poste dil campo, videlicet:
     
      Di Alla, di l'Emo, di 6. Come à 'uto aviso di Riva, che todeschi erano andati al Monte di le Madalene, vicino al monte, propinquo a Riva, dove è il bastiom, e trevano le artilarie fin su la piaza e loco di Riva. Item, voleno do colobrine per trazer a lhoro etc.
     
      Dil Gritti, provedador, date a Torre, di 6. Come, inteso il partir di todeschi, havia revochà l'andata in Riva di Pereto Corsso, lo qual l'à rimandato a Verona, a compir la compagnia. Item, scrito a Dionise di Naldo, non si mova di la guarda di Brentonega. Ma inteso poi, per letere di Riva ricevute quel zorno, todeschi esser al Monte di le Madalene, e tirar a la terra, à scrito tutto vengi justa l'hordine dato; et mandarà le colobrine in Riva, qual à [390] mandate a tuor. Item, fato molte altre provisione, ut in litteris etc. Et manda più letere aute di Riva et altrove.
     
      Di Riva, dil Renier, provedador, et sier Zuan Moro, capitanio dil lago, è lì. Li scrive li successi etc., ut in eis.
     
      Di Zuan Jacomo di Vilmarcha', vice colateral, è in Riva. Scrive molte cosse, lauda sier Andrea Morexini, di sier Zustignan, e li avisa li successi minutamente, e si provedi; e tien siano li todeschi per la Val di Ledro, la qual hanno auta.