[396] Da poi disnar fo colegio di savij ad consulendum. Etiam la Signoria si reduse, et fo cazà li papalista.
     
      In questo zorno, per sier Anzolo Trivixan et sier Zacaria Dolfim, fo expedite le do galie bastarde, con 100 homeni per una, patroni Andrea di Viviam et ... Brocheta, et aspetano tempo per passar in Istria. Item, si solicita armar sier Vicenzo da Riva et sier Francesco Marzello; sì che il provedador di l'armada nuovo, arà 4 galie bastarde et 4 galie sotil, potrà far facende a Trieste.
     
      [1508 04 14]A dì 14. La matina fo in colegio sier Alvixe Malipiero, venuto podestà di Verona, et referì molte cosse; e come veronesi si haveano ben portato. E disse le fatiche aute etc.
     
      Vene do oratori di Pordenon a darsi a la Signoria, con letere credential di la comunità, et voleano capitolar. Et il principe li charezò, dicendo andasse dal provedador zeneral, al qual era commesso queste cosse, et lui capitoleria; disseno esser andato etiam uno dal provedador. Or fono remandati in campo da sier Zorzi Corner, con letere li aceptaseno etc.
     
      Da poi disnar fo pregadi; et fo chiamato per far la risposta a l'orator cesareo. Et fo leto le infrascripte letere:
     
      Di Friul, di 10, 11, 12 et 13; et perchè ho scripto il sumario di le altre, di quelle di 13, venute ozi, scriverò, date pur a Marian. Come aspetano li messi mandati a Pordenon; et che di Belgrando li vene noncij, volendo capitolar. Esso provedador rispose, voler tuorlo a soa descrition, aliter non lo vol aceptar; et lui ritornò in driedo, sì che non è ritornato.