Poi disse, era stà retenuto a Trento zorni 18 da li consieri regij; e [400] questo era la indusia, non era prima venuto. El principe li rispose gajardemente et ben, justificando le raxon di la Signoria; et che soa majestà havia auto torto, et che nui si difendevemo virilmente. Poi disse, si consulteria con il senato e se li daria risposta etc.
     
      Fu poi posto la risposta per li savij dil consejo e savij di terra ferma, d'acordo, excepto sier Antonio Trum, procurator, da poi molte parole responsive, di la bona mente di questo stato versso soa majestà cesarea, semo contenti aceptar la trieva per uno anno, insieme con li nostri collegadi, et in questo mezo si trateria quanto dice soa majestà etc.; e questo fo il sumario di la risposta. Sier Antonio Trum, procurator, savio dil consejo, andò in renga, dicendo anche lui è di questa opinion di risponderli a questo modo; ma saria bon a indusiar, consultar, veder etc., et non corer cussì a furia. Li rispose sier Domenego Trivixan, cavalier, procurator, savio dil consejo, dicendo è bon acelerar tal risposta, per non dar sospeto a Franza. Or il Trun messe indusiar a doman. Andò le parte: 0 et 0, 85 dil Trun, 93 di savij; et fo preso la risposta, e con questo, sia comunichata con Franza et Spagna.
     
      [1508 04 15]A dì 15, fo San Sydro. Fo fato la precessiom de more. Vi era lo episcopo di Sibinico, piovan di San Fantin, mitriato, et col principe l'orator Franza, Spagna et Milan, Ferara et uno baron hongaro, qual fo lassato qui per l'orator hongaro, andò a Roma per aver danari.