Fono letere di Franza, date versso Lion. Il re vien a Liom; e altre particularità, come scriverò di soto.
     
      Di Milan. Il gran maistro era amalato etc.
     
      Di Roma, di ... Come il papa si à 'legrato con il nostro orator, che 'l campo dil re di romani era levato di Riva etc.
     
      Da poi disnar fo colegio di savij, come ho dito; et la sera vene letere di Friul, come scriverò il sumario.
     
      Di Goricia, dil provedador Corner, di 21, hore ... Come stratioti erano corssi versso Lubiana, fato gran butin di animali, et menato a salvamento; et 0 di zente apareva. Item, esser intrato in rocha uno nodaro di Udene, per far la descrition di le robe dil capitanio restava lì, da esserli pagate. Item, quelli sono di opinion, ut supra, di rendersi.
     
      Di Alexandria se ave nova, per letere di Candia, di 30 marzo, particular, per uno gripo portate. Come sier Andrea Bondimier, capitanio di quelle galie, era ancora lì, et havia auto letere di sier Marin da Molin, consolo, che l'andasse, et era conzo tutto, excepto dil piper. Et etiam era zonto le letere di la Signoria, che andasse di longo; et cussì a dì 2 april si doveva partir per Alexandria.
     
      [1508 04 23]A dì 23, fo il zorno di Pasqua. Et la matina tutta la terra fo piena dil zonzer eri serra, a horre 4 di note, Zuan Cotta, secretario dil signor Bortolo, vien di Goricia per stafeta. Avisa il rendersi di la rocha a' nostri, il sabato santo, horre 13; et che nostri erano intrati dentro. E poi, a horre 7 di note, zonse uno nontio dil Corner, provedador, nominato [409] Zuan Piero ..., con soe letere.