Di Spagna, di sier Francesco Corner, orator nostro, date a Burgos, a dì 25, 26 marzo. Come ha comunichà al re di la venuta qui di l'orator ungaro e la causa; e di progressi contra il re di romani, li piace. Item, che la mojer dil gran capitanio à spazà uno homo al re di romani, e il re l'à inteso, li dispiace; et altre occorentie di lì. Poi, zercha [413] la liga trina si trata, et coloquij; et averli expediti in Franza con il tenor, come ho scripto di sopra.
     
      Et compito di lezer le letere, che fonno molte,
     
      Fu posto, per sier Marco Bolani, sier Andrea Venier, sier Antonio Trum, procurator, savij dil consejo, sier Hironimo Capelo, sier Zorzi Pixani, dotor et cavalier, sier Piero Lando, savij a terra ferma, sier Nicolò Bon, sier Bortolo da Canal, sier Daniel Zustignan, savij ai ordeni, scriver al provedador Corner zeneral, che vadi con le zente a l'impresa di Trieste; et questa è la nostra opinion col senato. Et sier Domenego Trivixan, cavalier, procurator, savio dil consejo, contradise, dicendo è bon soprastar per non iritar più etc.; li rispose sier Antonio Trun. Et il Trivisam, con sier Lunardo Mocenigo, savij dil consejo, sier Tadio Contarini, sier Hironimo Querini, savij a terra ferma, sier Domenego Pizamano, savio ai ordeni, messeno de indusiar questa materia. Ma sopravene letere et fo lete; et fonno poi sequitato disputatiom. Et poi sier Piero Capello, consier, andò in renga, dicendo era di opinion indusiar e spazar prima la risposta in Franza, perchè erano di do opinion il colegio; e cussì, insieme con quelli 5 savij, messe indusiar questa fin doman, e si spazi prima la risposta in Franza zercha la liga.