[1508 04 28]A dì 28. Da poi disnar fo consejo di X simplice. Feno do ordinarij a la canzelaria, in loco di Anzolo Trivixan et Domenego Ceja, morti; et rimase Hironimo Trivixan, è con l'orator nostro in Franza, et Nicolò Daga, è con il Loredan, capitanio di le galie grosse. Item, do extraordinarij: ... Spineli di Zuane, è a li governadori, et ... Galina. Item, feno li capi di X, per il mexe di mazo: sier Bernardo Barbarigo, sier Marco Antonio Loredam, sier Francesco Foscari, el cavalier.
     
      Di Roverè fo letere dil Pixani, et dil Diedo, provedador, di 26. Avisano, nostri aver terminà tuor l'impresa di la Piera; et è venuto il capo di bombardieri per le artilarie lì; e in la Piera è pochi.
     
      [1508 04 29]A dì 29. Da poi disnar fo pregadi, per far uno castelan in Goricia, in loco di sier Francesco Corner, di sier Zorzi, el cavalier, per il qual il padre à instato summamente. Et fo leto queste letere:
     
      Dil Corner, provedador, di 26 et 27. Zercha l'aquisto di Duim; et esser stà posto per il provedador Contarini, sier Piero Gradenigo, di sier Cabriel, era nobele in armada. Item, ave l'ordine, a dì 27, hore 22 etc., ut in litteris: ho il sommario qui avanti. Vanno a l'impresa; a dì 29 si doveano acampar. À mandato l'artilarie, pezi 18, per mar. Il signor Bortolo è al castelo di Prosech, qual non si vol render etc.: à posto, col provedador Contarini, hordine a tutto. Item, à uno aviso de Vipao, da uno era vice capitanio in Goricia, come in Lubiana era zonto il ducha di Bresvich, con persone X milia, venuto per socorer Goricia; ma, inteso esser persa, non sarà altro.