Sier Nicolò Zustignam, el grando, quondam sier Ferigo.
      Sier Andrea Paruta, fo cao di 40, quondam sier Zuane.
      Non. Sier Andrea Balbi, fo provedador a Sonzim, quondam sier Stai.
      Non. Sier Alvise Arimondo, fo a la messeteria, quondam sier Zorzi.
      Non. Sier Zuan Malipiero, fo piovego, di sier Hironimo.
     
      [1508 04 30]A dì 30. Da poi disnar fo gran consejo. Et la matina era deputado, che 'l principe, justa il solito, andar dovesse a San Zuminian. E portava la spada sier Nicolò da cha' da Pexaro, va podestà et capitanio a Crema; suo compagno sier Alvixe Emo; ma, per il tempo, non andoe etc. Et a consejo vene letere di Alla, di provedadori, di certo remor seguito tra spagnoli et nostri ut in litteris, et esser stà tajata; sì che le cosse di lì passano a questo modo. Et gionse qui sier Zuan Emo, di sier Zorzi, stato da suo padre a Alla.
     
     
      Sumario di letere di sier Francesco Corner, di sier Zorzi, el cavalier, scrite di campo, in Friul, a sier Jacomo, suo fradelo. In la prima di 13 april, hore 2 di note, data ... 1508.
     
      Frater carissime.
      Heri te scrissi el venzer di la terra di Cremons, che per mia fe' è stato cossa maravegliosa, che in cussì pocho spatio di tempo sia stà preso una forteza, posta su un monte alto et forte di mure, de fossi et de repari; maxime che dove fo piantade le artilarie nostre, et fo condute le artelarie, per strada ch'io temeria poterli andar a piedi. Tamen tutta la note per forza de homeni fo lavorato, et, avanti fosse zorno, fonno piantate tute le artelarie; cossa incredibile.