Se farà el tutto, quando el proveditor dovesse pagar dil suo ogni summa di danari. Ne la terra era capitanio domino Zuan Ausperger, capitanio di Lubiana, homo disposto et, per fama, gran richo. Questa è stata una belissima impresa, maxime con la pocha quantità di zente se trovavemo; et credi che la non è cossa da restituir, per esser locho di gran importantia et in belissimo sito. Dio ne doni gratia, Che habiamo la rocha presto, a ziò si habbi causa di fortificarla et restaurar el roto, che sarà molto a preposito de la illustrissima Signoria. Dogliomi solum de una cossa, che 'l magnifico proveditor non habi posuto veder con l'ochio questa gloriosa impresa, como per relation hala sentita; che invero io ho visto tanto apasionato trovarsi in leto, per non poterssi exercitar, como era el desiderio suo, che dubito, se non veniva questa bona nova, el suo male era per esser più longo di quello bisognava; ma spero che questa vitoria sarà stà la sua medicina, che li darà la sanitade. Io son restato in Goricia volentiera, per devedar non se meti a sacho, et per far quello mi è stà comandato et per el signor proveditor et governador. Quello seguirà del castello, doman te lo farò asaper.
     
     
      Letera dil dito, 18 april 1508.
     
      Frater carissime.
      Per dirti el successo del castello, sapi che tutto eri si stete im praticha di acordo, et ozi si ha continuato, talmente che se ha concluso in questo modo: zoè che per tuto venere, a hore 28, zoè a dì 21, se 'l non li vien socorsso, che possi cazar el nostro campo di la terra, sabato da matina el castelo ne sia dato ne le mane, con tute le munition del dito castello, exeto che sia riservato al capitanio, missier Andrea, tutto l'aver suo et de li soi soldati, acompagnati fino in locho sicuro.