E questa sera il signor gubernator à fato intender a la magnificencia di missier, aver fato intrar in castello quel spagnol, che è qui in campo, ch'è quello ha pratichato tal acordo, insieme con uno nodaro da Udene; sì che spero e fazo certo vostra magnificencia, la cossa succederà ad vota. Doman da matina la magnificencia di missier monterà a cavalo per Goricia, aciò personalmente proveda a tutte cosse neccessarie a tal expeditione etc.
     
     
      [428]Letera di sier Zuan Foscarini,
      data in Pordenon, a dì 21 april, al dito.
     
     
      Cugnado carissimo.
      El parse al magnifico provedador di mandarmi a tor lo posesso di Belgrado, locho dil signor Constantin; e cussì io andai volentiera. Da poi parse a sua magnificencia di mandarmi a tor lo posesso qui a Pordenon; e cussì vini eri, fu zobia. Dove venendo, el capitanio di questo locho, todesco, mi vene incontra mia 4 con questi citadini e molti altri a cavalo, di più di nui assai, a cavalo homeni 100 e bon numero di fanti a pe'; dove io lo acharezai assai, e lui mi fece el debito con tutti. Da poi se aviasemo e intrasemo im Pordenon, dove loro fezeno gran demostrazion di honorarmi; li fo diserado archibusi assai, per modo che li cavali erano tanto inspauridi, che non li podevemo cazar avanti. Lì arivasemo in el castello. Sua magnificencia mi apresentò le chiave di la torre de dito castello; e cussì io le azetai, per nome di la illustrissima Signoria nostra et dil magnifico provedador. Dove ringratiò prima sua magnificencia e tutti noi di l'honor etc.; saria contento star qui qualche mese etc.