Ne bisogna polvere, balote e scale; et volemo impiantar 18 pezi di artilarie a Trieste, con quelli basilischi di l'armada, sì che bisogna più di 1000 barili di polvere al zorno. Francesco voria venir da mi; solicita si fazi etc.
     
     
      Sumario di letere, di 22 april 1508, in Alla,
      di sier Zacharia Contarini, di sier Alvise,
      a sier Cabriel Emo.
     
      Ozi, da poi manzar, el montò a cavalo el nostro capitanio, con il provedador Emo et altri, e andasemo tutti in la valle de Brentonego, e li andasemo vedendo Mori e Ravazon bruxado. E in questo corse uno a cavallo et disse, come a Luo del Caxal, che xè una villa, ne la qual ne sono alozadi 100 cavalli di homeni d'arme, e per mezo a una altra villa di là di l'Adexe ne sono alozadi zercha 800 guasconi, i qualli bona parte erano pasadi di qua, et se apizò con uno nostro homo d'arme, e comenzono a menar le mane; et hanno essi guasconi spogliado li homeni d'arme et feridi parechij di lhoro, toltoli le arme et getade nell'Adexe, et svalizadi tutti li soi alozamenti. Etiam qui, per mezo Alla, altri guasconi si havevano messo in arme, e volevano passar di qua et sachizar Alla; et li spagnoli, a la Chizola, si erano in arme, et noi, venendo zoso da le Corone, ne tolseno la strada, sì che ritene il proveditor e tutti nui, fino vene el suo capitanio. E tutto fanno, perchè non sono pagati da Franza, et la neccessità li fanno far ogni mal. Sono cosse molto pericolose et stranie. In vero, si toleseno qualche butino, certo i se taglieriano a pezi como cani, per esser zente senza discretion, et voleno far a suo modo.