Et cussì si ave letere di l'orator nostro, da Lion, di 28; il sumario scriverò poi. Fono bone letere, e tutti aliegri per tai letere.
     
      Da poi disnar fo consejo di X con zonta di colegio e altri.
     
      Noto. Eri a gran consejo fu posto, per li consieri, che li avochati per le corte, cussì di San Marco come di Rialto, li quali con faticha avadagnano, nè anno alcun salario, imo pagano tanse, e atento la parte ultimate presa, che tutti li officij habino contumatia; perhò l'anderà parte, che diti avochati presenti e futuri possino esser electi, et non habino alcuna contumatia. Et andò la parte; non fu presa di una balota. Iterum balotata, ave più de 600 balote di no, sì che non fu presa alcuna cossa.
     
      739 767
      365 660
      5 0
     
     
     
      Non capta, vol duo tertia.
     
      [1508 05 03]A dì 3, fo la †. Fo gran consejo.
     
      Fo letere, la sera, dil Corner, provedador, date a Muia, a dì 2, hore 2 di note. Si preparava il tutto per andar col campo a Trieste; voleano il tutto fusse in hordine, perchè di qui si manda più cosse, polvere, balote, artilarie etc.
     
      Nota. Si dice, per via di fontego, il re di romani esser amalato di sora Yspruch; tamen non have mal da conto.
     
      [1508 05 04]A dì 4, la sera, fo letere dil Corner, provedador, date in galia, a dì 3. Come il campo era posto soto Trieste, e piantate le artilarie, et a dì 4 doveano comenzar a bombardar da terra; sì come il sumario di tutte queste letere scriverò al loco suo.
     
      Fo mandate a Trieste 2 barbote coperte, una di remi 38 et l'altra di 32, andar soto le mure.
     
      [438] Item, si partino de qui molte barche di zentilhomeni nostri, e andono a Trieste, parte per comprar butini, perchè la terra anderà a sacho, parte per veder darli la bataglia; et cussì altri populari.