Dice ulterius, che essendo in camino, l'à trovato molti olachi, a 4 et sei al trato, quali andavano in grandissima pressa a i sanzachi de Scopia, Bossina et tute altre parte del signor turco, per comandarli, per parte del signor turcho, che se debino meter in ordine, che ad ogni richiesta dil signor cavalchino. Item, dice che ne le terre dil turcho è grandissima carestia de biave, et che i formenti valeno aspri 18 el chilo, et l'orzo aspri 16.
     
     
      Nota. In uno aviso, leto ozi im pregadi, era il signor Sophì esser contra Alidulli, et averli dà certa rota; et aver cavali 80 milia et 40 milia pedoni.
     
      Si arma a l'armamento do galie sotil, sopracomiti sier Lunardo Zustignam, et sier Alvise Contarini, quondam sier Piero.
     
      [1508 05 07]A dì 7, domenega. Avanti nona, una horra, vene una barcha, conzada a modo uno bregantino, con remi 7, qual era di Martim da Zara, solito andar ... di galia, andato a Trieste con altre barche di Castello per suo piacer, et era fornita atorno con verdure e una bandiera di San Marco; dismontò al ponte di la Paja, et lui corse in colegio. A bocha disse, eri, a horre 22, Trieste aversi reso a la Signoria nostra, salvo l'aver, et la rocha, etiam salvo l'aver e le persone, et nostri intrava dentro; e cussì acertava ditta nova esser la verità. Il colegio, era levato in caxa dil principe, fo inteso tal nova, mandata a dir per tutto, e tutta la piaza fo piena e gran gaudio in la terra. E tal nova mi fo mandato a dir a caxa per sier Zacaria Dolfim, mio cugnato, è executor sopra le cosse di la guerra, el qual a San Marco intese, di bocha di ditto Martin, tal nova.