Qual si butò in zenochioni, dimandando misericordia, volendossi render la terra, e il castello, a lui provedador, per nome di la illustrissima Signoria nostra. Il che subito lo mandò con suo homo al magnifico provedador zeneral. Di la qual victoria se ne aliegra summamente etc.
     
      Di sier Marco Loredan, capitanio di le galie bastarde, date in galia, a dì 6, hore 22, a presso Trieste. Avisa questo medemo et si alegra; et scrive più copioso, che quella dil provedador di l'armada, ma di quella substantia. La copia sarà qui sotto.
     
      Di sier Francesco Contarini, sopracomito, a soi fradelli, date, a dì 6, hore una di note, in galia. Avisa, nostri esser intrati in Trieste, qual si à reso la terra in descrition dil magnifico provedador zeneral, salvo le persone, et la rocha salvo l'aver e le persone. Et è stà messo provedador, in la terra, sier Marco Loredan, capitanio di le galie bastarde, et in la rocha, sier Vicenzo da Riva, castelan.
     
      Et poi, hessendo intrato scurtinio dentro, per far [444] governador di l'intrade, fo leto al consejo, per ditto Gasparo, una altra letera, a horra zonta, dil predito provedador di l'armada, data in galia, im porto di Trieste, a dì 6, hore una di note. Avisava lo intrar di nostri in la terra e rocha; et esser stà messo, per il magnifico zeneral, in la terra, sier Marco Loredan, et in la rocha, sier Vicenzo da Riva; e come lui provedador andò in terra dal provedador zeneral. E scrive, che quel zorno fo combatudo con i nimici, et poi si reseno; et che, per letere dil provedador zeneral, si saperà le conditione.