a horre 2 di notte.
     
      Frater carissime.
      Eri sera scrissi etc., e arai inteso l'aquisto, non mancho bello di quello digli altri, per esser la terra forte, el castelo fortissimo, che reputo sia stà una cossa miraculosa del tuto. Dio sempre sia rengratiato. Et è stà bella gratia, maxime in obviar el sacho, che per mia fe' è stà tanta faticha a far questo, che ho visto il proveditor in mazor affanno, che di altra operation l'ha fato in questa impresa, perchè da una banda i soldati, insolenti, con brute parole dicevano esserli stà promessa, et haveria rasone, da l'altra banda se desiderava conservarla, per esser molto a preposito a la Signoria nostra, et per compassione, che credi non esser mazor pietate al mondo, che veder una terra andar a sacho, tanto più che con parole se haveria reservato Goricia; et se per caso non se havesse trovato el proveditor in campo, credo che in mancho de una horra tuta saria stata a botino. Tandem, per non star queste zente malcontente, per ogni caso potesse occorer, se ha operato, che questi de la terra hanno promesso dar a li soldati ducati XV milia, d'acordo de tutte do le parte. Resta solum una differentia, che lhoro voriano pagar tal danari fra 3 mexi, et i soldati voriano fra 3 dì. Et a questo se à tolto per expediente, che mandano a Venecia 4 soi citadini, per veder di trovar tal danari, o per via di cambij, o vero vendendo le sue marchadantie. Reputo sia stà molto a preposito di la Signoria nostra haver tenuto tal via, azò non se perdesse cussì bella cità, di sito, di caxe, di muri, molto bella et importante a le cosse di la Signoria nostra; sì che saria tempo, la Signoria desse licentia al proveditor di venir a riposar, azò, quando el bisognasse, se potesse exercitar ai soi servicij.