1285. A dì 8 mazo, a tempo del serenissimo missier Zuan Dandolo, doxe, triestini, havendo guerra cum la Signoria el patriarcha de Friul per causa de l'Istria, se deteno ad quello, violando la fede. La Signoria li mosse grandissima guerra, et per terra et per mar stete ad combaterla longamente. In soccorso de lhoro era el patriarcha, cum el conte de Goricia, cum molte zente et numero de cavalli 6000 et pedoni 30 milia; hessendo a l'incontro, di nostri, uno terzo de quelli de Venetia che podea portar arme. Tandem, da poi molta strage da una parte et l'altra, fu fatto accordo et pacti cum i triestini.
     
      1291. A dì 11 febraro, a tempo del serenissimo missier Piero Gradenigo, doxe, fo fatto altri pacti cum triestini.
     
      1368. Triestini, a tempo del serenissimo missier Andrea Contarini, doxe, per cason de uno certo [448] contrabando de formenti, amazono nel porto suo el soracomito de la galia de Veniexia, che guardava el colfo da i contrabandi, et feriteno molti homeni. Veneno a domandar misericordia a la Signoria nel ditto milesimo, a dì 3 septembrio, et fono tolti a gratia. Et zurono perpetua fideltà, et confermono tutti li dicti pacti del 1202 etc., et se obligono levar San Marco al palazo suo, a la piaza, ne le feste principal etc., et dar ne le man quelli do so zudexi, che fonno causa de l'excesso, et che, si quelli non venivano a Venetia, fosse in bando de terre et luogi.
      Da poi triestini, mossi da le spale del patriarcha de Aquileja, butono in terra el stendardo de San Marco, et quello squarzono.