Dal che nassè guerra, et la Signoria assediò Trieste a dì 15 dezembrio, combatandola da terra et da mar. Et essendo oppressi, li triestini domandono ajuto da Alberto et Leopoldo, duchi de Austria, li qual veneno con persone X milia in suo soccorsso. Et la Signoria, ingrossando el campo suo, fece molti bastioni et fosse, et fonno molte volte a le man insieme, et feceno assai presoni tra lhoro. Et a le fin i todeschi se convene partir nel 1369, a X novembrio; unde li triestini, desperati, se deteno a la Signoria a dì 18 ditto, et introno dentro i nostri, dando etiam tuti i suo' castelli etc. Et nel 1370, a 30 octubrio, fo fato la pace cum i duca de Austria, li qual cesse le rason haveano in Triest etc. a la Signoria, et la Signoria li pagò ducati 75 milia per questa cession. Fo mandà podestà lì in Trieste missier Andrea Zen, et capitanio missier Saraxin Dandolo.
     
      1380. Triestini, essendo la guerra de Chioza cum zenovesi, poco avanti la Signoria la recuperasse, se deteno a Marquardo, patriarcha de Aquileja, confederato del re Alvixe de Ungaria, zenovesi et el signor de Padoa, contra la Signoria, preso el suo rector missier Donado Trum, et posto in ferri.
     
      1381. A' 8 avosto, ne la pace fatta a Turrin in Savoja, tra li ditti signori da una parte et la Signoria nostra da l'altra, per uno capitolo vien termenà, che Trieste, cum i castelli etc., romagni al patriarchado de Aquilegia, reservada la regalia de la ribuola et ojo a la Signoria nostra.
     
      1463. Triestini, facendo molte novità, sì cercha sali, [449] come altro, contra quello doveano, et portandose tristamente verso i subditi de la Signoria; tandem la Signoria, a tempo del serenissimo missier Cristofal Moro, doxe, mosse guerra ad essi triestini.