Né se poteno tenir quelli spagnoli, che non comenzasseno meter a sacho el castello, non obstante che 'l magnifico missier Zorzi Emo era dentro intrato. El qual se ha portato da Cesaro in tutta questa impresa, sempre con le arme indosso, andando ad ogni pericolo. Hor Idio sia laudato, se atenderemo ad altro. Siamo venuti qui adAlla per mudarse et un pocho ristaurarse, che siamo mezi morti; et doman torneremo in campo, a Dio piacendo, a Mori, dove sono i do illustri capitanij, et el magnifico missier Andrea Gritti, con le zente d'arme.
     
     
      Letera di Zuan Francesco Bertoldo al dito,
      data in Alla, a dì 7 mazo 1508.
     
      Io vi scrissi, come andavemo ad Agresta a campo. Zuoba prosima passata se levassemo di qui di Alla, tutti inanzi zorno, et tuto el resto dil campo, et andassemo a Mori sotto Agresta, et lì se alozò el campo, et el magnifico missier Zorzi volse andar di longo a Nago per far condur le artilarie, et andassemo di longo fino a Riva, dove se inbarchava do canoni, do colobrine et do falconeti. Et zonto le fo a Nago, li venissemo driedo et le fessemo descargar et tirarle su a Torbole, a forza di homeni, che steteno fin nocte. Et a 4 hore se partite el capitanio di le fantarie, che era lì a Nago, con cercha 1500 fanti, et andò a prender el monte inanzi zorno; et da l'altro ladi se apresentono spagnoli et francesi, et li fo dato una bataglia et brusorono la porta del revelim et introno dentro. Nui etiam levassemo, meza horra drio el capitanio, pur quella notte, con scuro, armati, per far tirar su l'artellarie, et stessemo fina a la sera, che non fo possibele tirar altro che una colobrina, per forza di homeni, per la la rateza del monte, che è da 7 miglia, et con volte spesse et aspre, che bisognava a dedo a dedo moverla, cosa che chi vedesse quella via, diria non è mai possibile li sia andato lì suxo.