Et si non era, che 'l parse el socorso che veniva al monte, el provedador se dubitava a vegnir fora. Ma, vedendo li nimici che se calavano, che erano da 6 in 7000, fo dato el tamburlo a l'arme, et tutti corseno a le sue bandiere et se messeno in un squadron grando, et li nostri in un altro. Et li nimici se calorono in getto de schiopetto, et scaramuzono un pezeto con li schiopetti, et trazessemo alguni falconeti, in modo, che vedendo persa la terra, e per il che erano venuti a mostrarse, se retirorono. Et alhora la magnificiencia dil provedador ussite dil castello, et venissemo zoxo qui ad Alla, perchè ancora non havemo portato le nostre robe a Mori. Et fo lassato el capitanio di le fantarie in castello con circha 300 fanti, che 'l lassasse dentro quelli li parà. El qual è ancora lì et fortifica et mette in ordine el castello, el qual è un loco molto forte, et fornito di biava per un anno a 500 persone, vini assai, carne salade, formazi; ma ge sono etiam stà portà fuora assai. Questa è stà la mior impresa se habi possuto tuor per prima, per esser un beletissimo paese, et poi che l'è asegurato la strada vien di brexana, per le vitualie, et Brentonega et parechij altri lochi. Credo, doman se metterà ordine di qualche altra impresa, che mai el mio magnifico provedador Emo non fa se non solicitarli; il che, si 'l sarà, ve ne darò aviso. Altro non habiamo etc. È stà lassato in castello sier Zuan Vetor Badoer, fo di sier Rigo, che se ritrovava a Rovrè, et era venuto a veder la festa.