Item, il re di Franza à tolto le intrate al cardinal di Renes et a lo episcopo di Unbron in Franza, non venendo habitar in soi vescoadi.
     
      Fu posto, per i savij, d'acordo, scriver a sier Zorzi Corner, el cavalier, provedador zeneral, che, consultato col magnifico governador et provedador di l'armada, debino seguir l'impresa di Pesim et di Fiume etc. Ave tutto il consejo.
     
      Fu posto, per i savij tutti, excepto sier Piero Lando, savio a terra ferma, risponder al vescovo di Trento, a la letera scrita a la Signoria, che voria si tratasse trieve etc., justa quello à ditto domino pre' Lucha. Et si scrive una letera longa di la bona voluntà nostra versso la cesarea majestà et romano imperio, e a l'incontro quello ne ha fatto contra ogni raxom, commemorando il tutto; et in conclusione, che semo di quel medemo voler havemo sempre ditto etc. Sier Piero Lando vol la letera, ma vol continuar, che havemo scrito a li provedadori nostri zenerali in campo tratino ditte trieve. Et sier Polo Pixani, el cavalier, consier, volse la letera, ma si dichi, che quando saveremo soa majestà haver dà mandato sopra di ziò, nui provederemo di persone [456] con nostro mandato, che questa cossa traterà. Or parlò il Lando primo, per la so opinion, poi sier Polo Pixani, et demum sier Antonio Trun, procurator, savio dil consejo. Andò le parte: 20 dil Lando, 30 di savij, 120 dil Pixani; e fo presa.
     
      Fu posto, per i consieri, cai di 40 et savij tutti di colegio, excepto sier Antonio Trum, procurator, elezer de praesenti uno provedador a Trieste, per scurtinio, per uno anno, con ducati 60 netti al mexe per spexe, meni 6 famegij; et uno castelan di la rocha, con ducati 30 netti al mexe, e stagi serado, e sia eleto per eletion di la bancha et 4 man di eletione.