Sier Antonio Trun, procurator sopradito, messe de ruinar Trieste. Sier Lunardo Mocenigo, savio dil consejo, parlò; et parlò etiam il Trun, el qual, insieme poi con li savij ai ordeni, messe indusiar a doman, e tutti vengi con le sue opinion, utrum si dia ruinar, o far il provedador, o ruinar parte o tutta etc. Andò le do parte: 60 di consieri, e il resto nominati, et 108 dil Trun; et fo presa.
     
      [1508 05 09]A dì 9. Vene in colegio 7 oratori di Goricia, con letere dil provedador, sier Zustignan Morexini, la nome lhoro sarano qui sotto scripte, uno di qual, zoè il primo, vestito di veludo negro e sotto d'oro, per esser cavalier, il resto di negro et senza pompa. I qual, intrati in colegio, tochato la man al doxe et altri di colegio, feno far, per uno nodaro lhoro, una orationcella latina, dicendo erano venuti a far reverentia a la Signoria nostra, volendo esser boni subditi e vasalli. Il principe li usò bone parole, aceptandoli etc.
     
      Domino Symon de Ungrispach, capitanio di Pordenon, cavalier,
      Domino Zuan Phebus de la Torre,
      Domino Federigo de Atimis,
      Domino Christoforo Rasaver.
      Domino Bernardo de Rebatis,
     
      per la nobeltà
     
      Michiel Cusmano.
      Martim Boemo.
     
      per el populo
     
     
      Fo terminato per colegio, che la galia è in lago di Garda sia desarmata, et sier Zuan Moro, capitanio, resti a Riva con li soi oficiali; et li homeni di la galia siano tolti in nota, e cussì di la fusta, et mandati a caxa, pagandoli, et che stagino preparati ad ritornar in galia ad ogni bisogno.
     
      Da poi disnar fo etiam pregadi. Et fo leto una solla letera, data a Mori, di sier Andrea Griti, provedador zeneral, di 7. Avisa esser stà in la forteza di [457] Agresta, la qual lauda grandemente per il sito e qualità sua.