Sier Hironimo Contarini, quondam sier Antonio, quondam sier Nicolò.
      Sier Alvixe Soranzo, fo pagador a l'armamento, quondam sier Remisi.
      Sier Catarin Zen, fo podestà a Montagnana, di sier Piero.
      Sier Filippo Barbaro, fo zudexe di mobele, quondam sier Zacaria.
      Sier Zuam Falier, el 40 zivil, quondam sier Bortolo.
      Sier Simon Orio, fo 40, quondam sier Hironimo.
      Sier Hironimo Diedo, fo cao di 40, quondam sier Andrea.
      Sier Vicenzo Gradenigo, fo cao di 40, quondam sier Domenego, el cavalier.
      Sier Hironimo di Prioli, fo 40 zivil, quondam sier Ruberto.
      Sier Sabastian Trivixan, fo al dazio dil vin, di sier Baldissera.
     
     
      Di Cadore vene una letera, di sier Zacaria Loredam provedador, di 7, la qual fo leta in colegio. Come, zà alcuni dì, havia inteso di certo miracolo di una Nostra Donna dipenta a uno capitello su una strada, la qual la galta è meza rossa come sangue, et questo è la matina, e cussì il peto, poi la sera è biancha et à grandissimo socorsso. Et questo rosso vien da la parte dil Friul, adeo tutti dubita di gran crudeltà e sarano gran guerre. Et che lui provedador, hessendo andà per dar la paga a li fanti [461] sono a custodia dil passo di 3 Ponti, à visto occulata fide; sì che à voluto scriver tal nova, qual di lì di altro non si parla.
     
      Di vicentina fo letere, di sier Vicenzo Valier, capitanio et provedador, date a Primolam, le qual fo lecte el penultimo pregadi. Come lì, e atorno, è fanti 2000, et voria far qual cossa; et si la Signoria volesse, con 2000 altri fanti che li mandasse, li basteria l'animo far facende a Nomi et Lavarom.