Di Roma, di X et XI. Il sumario scriverò poi.
     
      Da poi disnar fo gran consejo; et vene a consejo uno dotor nuovo, sier Marco Gradenigo, di sier Bortolo, qual a Padoa, a dì 12, si conventoe. Item, fo fato podestà di Padoa sier Francesco Foscari, cavalier. Et perchè fu tolto, tra li altri, sier Christofal Moro, che vien luogotenente de Cypri, et non era zonto qui, vertite diferentia tra la Signoria, si poteva esser balotato; unde fo messo, per viam declarationis, tre prime tre (sic): zoè sier Zuan Mocenigo, sier Piero Capello, consieri, et sier Alvixe Baffo, cao di 40, in luogo di sier Lorenzo di Prioli, consier, cazado, per sier Francesco Foscari, cavalier, tolto, che si potesse provar; et a l'incontro sier Alvise Venier, sier Polo Pixani, cavalier, consieri, sier Marco Antonio Erizo, cao di 40, in luogo di sier Stephano Contarini, consier, era di nominadi, che 'l non si potesse provar. Andò le parte, et fo leto le leze. Ave 24 non sinceri, 479 che 'l non si pruova, 917 che il si pruova; e questa fu presa. Et fo balotà, cazadi li electi, Contarini, sier Marco da Molin, Moro et Foscari, sì che eramo a consejo più di 1700.
     
      Fo letere di provedadori in veronese, date in Val de Mori. Come fevano far li ponti, per passar l'Adexe le zente d'arme, artilarie e fanti, et andar a l'impresa de la Piera.
     
      [1508 05 15]A dì 15. Da poi disnar fo pregadi. Et leto le infrascrite letere:
     
      Di sier Zorzi Corner, el cavalier, di 12 et 13, la prima a Monfalcon, l'altra a Goricia. La caxon dil suo levarssi di Trieste, per la fama di le zente redute in Lubiana; e questo per le deposition, ut patet, da 18 milia persone, solo il ducha di Bresvich, et altri dice dil duca di Baviera.