Et il provedador scrive di coloquij abuti con esso governador, qual non si contenta dil partido, dicendo: Avanti vi havesse dato Goricia, Trieste, Cremons etc. era una cossa, horra merito pur qualcossa con la Signoria illustrissima etc.
     
      Noto. Si ave, sier Marco Loredan, avanti zonzesse il Capello, provedador, insieme con Hironimo Contarini, provedador di l'armada, a Trieste, feno che tutte le arme lhoro di la terra fusseno portate in castello; et cussì triestini ubediteno.
     
      Di sier Zorzi Emo et sier Andrea Griti, provedadori zenerali, date in Val de Mori, più letere, l'ultime è di 13. Come erano compiti li ponti e comenzato a passar le fantarie, et poi diman passeriano le artilarie e zente d'arme, et vanno a la Piera, la qual è munita di artilarie et custodia et fanti, et vi è bon da bon numero di fanti alemani.
     
      Di Milam, dil secretario. 0 da conto.
     
      Di Roma, di l'orator, di X et XI. Come il papa havia auto gote con gran dolgie, dovea andar a Hostia. Item, dubita il mexe futuro de vita, perchè li astrologi l'ànno minaziato. Item, che 'l mandava il cardinal di Mantoa, come el scrisse, a Urbin, per conzar quelle cosse et aquietar la duchessa, licet il prefeto sia ducha pacifico. Item, quelli colonesi voleano andar a Cera. Item, il re di Franza havia tolto l'intrade al cardinal di ..., et uno maistro di cha' dil papa, episcopo etc.
     
      [471] Di Napoli, dil consolo, di 7. Come à referito al viceré et raine la nova di Goricia; li piace, licet molti nimichi di la Signoria non habino auto piacer.