Et questo ha fatto, più presto perchè stiano qui per obstasi, cha perchè l'achadino etc.
     
      Di sier Hironimo Contarini, provedador di l'armada, date in galia, a la ..., a dì ... Come è lì con 6 galie, mia X di Pexin, et vol dismontar e andar a tuorlo; aspeta Latantio di Bergamo, vien con 1000 provisionati per terra.
     
      Di campo soto Goricia, di sier Zorzi Corner, el cavalier, di 16. Come prepara per le cosse per andar versso Vipao. Item, à letere di Zuan Francesco d'Ascole, restato a Santa †, che la causa è stata el foco; e non si fa el seguito dil castelan e quelli erano dentro. Item, aspeta li danari, per dar le page a li fanti, e andar via; et che li fanti vanno mal volentiera, sì per non aver le so page, come perchè è mal contenti di le cosse di Trieste, e non hanno li danari etc. Item, di certo remor sequito per uno di la compagnia di domino Romeo di Pepoli di Bologna. Qual il governador, volendo admonirlo che lo faria impichar, el fradello di dito Romeo usò alcune parole contra il governador, qual disse: Ti faria etiam ti apichar, adeo ditta compagnia si voleva levar; e lui provedador convene aquietarli restasseno, con questo il provedador sollo li comandasse.
     
      Dil signor Bortolo d'Alviano, governador nostro, data in campo soto Goricia, a dì 15, [476] una letera longa. Di fortification bisogna. Et lauda sier Zustignan Morexini, provedador a Goricia, qual si porta benissimo in fortifichar quella terra, dicendo questi è de li provedadori bisogna, e non de li provedadori atende a cerimonie; e cussì scrive longo.