Datae Tridenti in arce nostra Boni Consilii, die XII maii 1508.
     
      GEORGIUS,
      Dei gratia episcopus et princeps tridentinus.
     
     
      Exemplum litterarum illustrissimi Dominii
      ad episcopum tridentinum, capta in Rogatis,
      die 16 maii 1508.
     
      Reverendo domino Georgio, episcopo tridentino.
      Intellectis iis, quae reverenda dominatio vestra nobis significavit in negotio tractationis treuguarum, asserens se et alios deputatos caesareae majestatis habere mandatum amplum et sufficiens ad eam rem tractandam et peragendam, ut quae scripsimus de [500] optima dispositione nostra re ipsa comprobemus, delegimus et deputavimus ad hoc virum nobilem et dilectissimum nostrum Zachariam Contarenum, equitem, qui die crastino in Dei nomine iter ingredietur, et Rippam proficiscetur, unde quam primum de appulsu suo reverendam dominationem vestram reddet certiorem, ut ad aliquem locum in confinibus, die et hora inter vos constituendis, convenietis et de ipsis treuguis tractetis. Quod visum est nobis, praesentibus litteris notum facere reverendae dominationi vestrae.
     
     
      1508, die 8 maii in Rogatis.
     
      Reverendo domino Georgio, episcopo tridentino.
      Accepimus legimusque litteras reverendae dominationis vestrae, datas Tridenti, in arce Boni Consilii, die ultima mensis aprilis proxime decursi, quibus indicat bonam mentem suam, ut, a motis, dissensionibus, caedibus et incendiis, quae maxime christianus quisque abhorrere debet, bellorum tandem dispendia in pacis commoda convertantur. Votum quidem christianum, religiosum et sanctum, aptumque in primis, et congruum iis, qui ecclesiastica dignitate sunt insigniti.