Le zente sono arivate, parte qui et parte a Monfalcon; et le artellarie, per farle portar, si lieva e va Trieste a levar le barche di Piran; e torneria subito per esser con il provedador Corner, che dia di breve arivar a Monfalcon. Vol polvere, balote, formenti o ver farine e biave di cavalli.
     
      Letera dil dito, di 27, hore 12, in campo a San Zuane de Duino, ricevuta a dì 29, hore 24. Come in hore 4 andò et ritornò, e trovò il provedador Corner partito di Duino. Et volendo andar da lui, esso provedador li scrisse veria a marina. E cussì quella matina era smontato lì a far cargar l'artillarie, con li homeni e maistranze di le galie, et ozi expediria e andaria versso Trieste. Et in questo vene il signor Bortolo, solizitando le zente passi in suso; perhò si provedi presto farine, polvere e balote, che quel erri fo mandà fo pocho al bisogno. Et aspectava li el provedador Corner; e di scalle à scrito al provedador Corner per esser necessarie.
     
      Letera di 28, in galia, importo di Muja, ricevuta a dì 2 mazo, hore 13, per l'armirajo. Come eri compite far cargar l'artilarie, e si non era lui, si haria stentato assai. Vene Jacomo, compagno di stendardo, con el triestino, qual fu subito expedito dal provedador zeneral e da lui. Have letere di Venetia, di 26, che era stà preso tuor l'impresa di Trieste e darla a dito provedador zeneral; dil che à 'uto gran consolation etc.: spera tutto procederà ad vota. E stando lì a San Zuane, sopravene dito provedador, con el qual stete bon spazio, e messeno quel'hordine si conveniva a la expedition.