Et terminono, che la note el si levasse e andasse a uno locho, nominato Persech, miglia X di Duino. dove è una rocheta in cima dil monte, atorno la [505] qual era acampato el ditto signor Bortolo, per poter meter hordine con lui quanto si havia a far; et non si potè levar, per il mar et vento da sirocho fresco, fino a mezo zorno. E ivi vene el signor Bortolo; vene in galia e disse, quelli di la rocha fevano difesa, nè si voleano dar, et li era stà feriti 20 di soi, per non haver artilarie; et havia diliberato non far amazar li soi, e, per non esser de importantia, lo lasseria da driedo e doman saria soto Trieste. E instò el mandasse dicti feriti a Muja a farli governar, e andar a far provision di pan, guastadori e altre cosse, expediente al campo; et fece meter li homeni su le barche e menati lì a Muja e fati medegar e alozarli; e à scripto a Humago, Piran, Cao d'Istria e Ixola, che fazino subito guastadori in quantità pro posse. Item, de homeni da facti armati e vegnino senza indusia. E sia fato bona provision di pan, vino, carne, formazi e altre cosse neccessarie al viver, e vegnino a spazarle di zorno in zorno, sì che spera il campo haverà abondantia di vituarie; e cussì lì a Muja si faria. E doman con tute le galie tornerà soto Trieste, e se darà principio in nomine Domini a bombardar da più bande dicta terra, che non crede vorano aspectar el suo excidio. Si duol non si provedi di polvere e ballote; e ne consumerano assai. Hanno sollo 300 barili in tutto, che non basterà uno zorno; et il signor Bortolo non vol principiar, se non ha assa' polvere, nè mai vol cessar de bater; etiam le galie ne vol assai.