Item, post scripta, ricevete le monition o artilarie desiderate, pur si mandi farine, formenti et polvere.
     
      Dil dito ivi, a dì 29 april, hore 14. Come era in quella matina tempo cativo, pur mandò a trovar il signor Bortolo a Porsech, de dove non era mosso, nè si leverà ozi per il tempo, al qual prima scrisse non si poteva discargar l'artilarie dove lui havia ordinà, e li disse uno altro loco più comodo, che per el piano si conduria fino a la terra, che sarà camino mia 2 1/2. El qual signor Bortolo li mandò a dir, doman saria versso Trieste e lì si poneria hordine a tutto; et manda uno di soi bombardieri con letere a la Signoria. Item, manda uno capitolo, di la forteza e sito e utilità di Duino. Aricorda si mandi polvere e balote.
     
      Letera dil dito, ivi, a hore 17, ricevuta a dì 2 mazo, hore 13. Come in quella horra il signor Bortolo è venuto con barcha a galia, e à voluto veder l'artilarie et la polvere, ch'è zercha 1000 barileti. A dito, non esser sufficiente per horre 6; e lui [506] non vol principiar la impresa, se 'l non vede polvere a suficientia, e si scrivi a la Signoria, dicendo la vitoria consiste in le artilarie. Item, desidera do canoni. À scrito per tutto per guastadori e animali da tirar artilarie, maxime in Cao d'Istria.
     
      Letera dil dito, ivi, a dì 2 mazo, hora prima di nocte, et ricevuta a dì 4, hore 12. Come, per l'armirajo, scrisse a dì 29, poi è stà gran vento di buora et mar, che per doy zorni non si ha possuto mostrar la faza al vento, eri sera feze bonaza. Et replicate le letere per l'Histria, erano venuti più di quello il sperava.