Et quella matina fe' levar tute le barche, con l'artilarie, munition et victuarie assai erano im porto a Muja, e le mandono da la banda di Trieste; e scrisse al signor Bortolo (qual li havia scripto, ozi si dovea acamparsi a la terra), acciò li mandasse scorta di cavalli, per meter ditte vituarie in terra e altre cosse. Et perchè l'havia esso signor Bortolo ordinato, che subito acampato, le galie dovesse con li basilischi esser soto la terra e tirar da quella banda, aziò non li facesseno molestia quelli di la terra; e cussì la matina per tempo tute le galie, numero 5, con le bastarde, andoe sotto la terra di Trieste, fino che le zente nostre se acampono, tirando più colpi grandi e picoli, con far di belle botte a' danni de' triestini. E state lì fino a hore 3 di zorno, zonse con la galia Riva il provedador zeneral Corner, al qual mandò ... Otobon, suo segretario, a comunicar certa nova, et dirli esso provedador era per partirssi con li do arsilij, solum per venir a metter l'artilaria in terra, e laudò. E cussì si levò del loco e non mezo (sic) di la terra, ita che l'artilarie di la terra li passava di sopra da ogni canto. E dato remurchio a uno arsil, e tutte le barche, mandò soto l'altro; e venuto al loco dil descargar, ne messe in terra pezi 4, i più grossi, con gran faticha, che (non) era possibile, senza le galie, il campo havesse ditte artelarie, e tuto quel zorno stete a tal opera, et aviò do pezi sopra i suo' leti e rode, solo para 35 bovi per uno, et fono tirate per senestre vie, che perhò sono le mior.