Unde esso provedador per questo spazoe subito a la Signoria con la sua depositione. Etiam mandò la copia al provedador zeneral; et spazoe do exploratori a la volta de Postoyna, per veder de intender qualcossa. E per bon rispeto à diliberato soprasieder do o tre zorni, aziò le cosse nostre non restino im pericolo, e fin tanto si atenderà a reparar quella terra etc.
     
      Letera dil dito, ivi, a dì XI, ricevuta a dì 13. Come, havendo auto letere di la Signoria che tolesseno l'impresa di Fiume, Pisin e altri lochi in quelli contorni, e cussì soprastato per le nove, pur mandoe in l'Hemo la compagnia di domino Lactantio di Bergamo con le artilarie; e lui provedador volea aspetar lì fino il ritorno di do soi exploratori mandati in quella matina a le parte di sopra. Tamen quella nocte si partiria e anderia fino a Monfalcon, per parlar di tal cossa con il signor Bortolo e il provedador zeneral; et, hessendo partiti, li scriveria etc. Et vedendo, insieme con sier Marco Loredam, provedador in Trieste, che erano lì da 7 in 8 todeschi, perfidi e inimicissimi di la Signoria nostra, quali fino al presente hanno 4 de suo' fioli in Alemagna, mandati per avanti a solicitar el soccorsso, e poi sono subditi nostri, hanno mandati diversi familiari de fuora, nè si sa a che effecto, et uno altro, qual uno suo fiol, ch'è con todeschi, marti vene ben acompagnato su questo teritorio, e fece preda da circa 400 animali minuti, e questi citadini fanno gran querelle per non tenirli qua. perhò ne mandano tre a Venetia, nominati Francesco da Chioza, Ambruoso Frescazonta et Christofal Bosserman, drizandoli a i signor capi dil consejo di X; e il provedador Loredan formerà el processo e lo manderà. Etiam ne sono di altri; ma per non far tanto squarzo, non li mandano etc.