Letera dil dito, in galia, a presso Fiume, a dì 30 mazo. Come ozi à 'uto letere di la Signoria, laudandolo di le opere a la expugnation di Pisim; la qual letera fe' lezer a li sopracommiti. Avisa, oltra quello à scrito, deputoe etiam in Castel Novo sier Marco Diedo, quondam sier Michiel, in Moscienica sier Zuan Venier, quondam sier Lion, in Lovrana sier Silvestro Minio, di sier Filippo, qualli etiam tutti si hanno ritrovato a queste vitorie. Item, à 'uto hordine licentij el capetanio di le galie bastarde, con la conserva, e che 'l vadi a Monopoli, per causa di le barze, e non bisognando, el vadi a trovar el provedador zeneral a Corphù.
     
      Letera dil dito, in galia, apresso Sant'Andrea di Ruigno, a dì 31 mazo, ricevuta a dì 2 zugno. Come eri sera si levò di Fiume per venir in Cao d'Istria a tuor il resto di biscoti erano lì per l'armada. Et avisa aver levado do altri citadini di Fiume, di li cordiali dil re di romani, et fonno quelli andono per tuor i danari, che la Signoria mandava al re di Hongaria, e li à mandati a li capi dil consejo di X. Zonto sarà a Trieste, farà partir le bastarde per Monopoli, justa il comandamento di la Signoria, e le barbote manderà a Venecia; e sopra li arsilij farà cargar le artilarie e le manderà versso Duino, come ha ordinato il provedador zeneral etc.
     
      Castelli e luoghi muradi, che haveva e tegniva lo imperador in Friul, et lo numero de le ville etc. aquistate per la Signoria nostra in questo anno 1508.
     
      Pordenom.
      Castelnovo.
      Belgrado.
      Cremons.
      Vipulzan.
      Flojana.