Ma el potria esser, che 'l suo signor non vol ad un tratto duj potentissimi nemici, el signor turco et el soldan, che seria argumento forsi el volesse tuor qualche altra volta; perchè ho inteso secretamente, come el Sophì mandò ambassador al turco, et quello li fece de gran rebuffi et menazi, et cazolo del paese, insuriando molto el Sophì suo signor, che facilmente potria esser che, ut supra, l'havesse inclination de andar de là. Tamen la cossa è ambigua et di molto suspetto; che quel che seguirà, se fin la mia partita se innoverà altro, a boca referirò.
      Ben voglio dir a la magnificencia vostra, che de qui el se dice da qualche pazo di nostri, quel che anche a Venetia da alcuni belli in bancha se rasona, che Sophì ha poco poder, et che 'l è un salvalaio; che invero se ne mentino et, como loro, senza intellecto, perchè, da poi Xerse e Dario, mai è [535] stà re de Persia, né tanto adorato, né amato da li suo', nè che sij stà più belicoso, nè che sia stà cum tanto exercito, nè sia stà sì fortunato. Perchè si vede i cieli haver facto a questa nostra età un miracolo, che excede tutti li miracoli, che un garzon de XII anni habia havuto ardimento, non essendo de linea regal, per forza d'arme e de seguito, bater li successori del regno de Persia, expugnarli et prender Tauris, et haver tutto quel suo amplissimo regno de Persia, tutto pacifico al presente, sotto el suo dominio, che Alexandro non have mai tanta prosperitade. Et hora se vede expresse de uno animo belicissimo, et sue imprese de nova guerra, che se la fortuna le aspira, come, da X anni in qua, in ogni suo ardimento li ha secondato, non credo che alcun altro signor passato el supererà di fama.