Et ritornato a Riva, expedì Otavian di qui, zonse a hore 7 a Lacise, e de lì in horre 12 è zonto in questa terra, venuto velocissimamente per le poste. Li fo promesso remeritarlo etc.; et fo scrito in Friul tal conclusion al Corner, provedador, et per tutto.
     
      [1508 06 08]A dì 8. Da poi disnar fo pregadi, per lezer letere.
     
      Et fo leto 4 letere di sier Zacaria Contarini, el cavalier: Et in una, che li deputati li mandò a donar una camoza, la qual lui partì per mezo e la mandò a donar al prescidente. El qual l'aceptoe, dicendo l'aceptava come cossa mandata per lui e non per todeschi; et il Contarini li mandò a dir, cussì come erano uniti lì, cussì havia voluto partir il presente mandatoli per todeschi etc.
     
      Di campo, di Val di Mori, più letere. 0 da conto; solum missier Zuan Jacomo si vol levar, subito concluso la trieva. Item, haviano terminato tuor l'impresa di Castel Barcho. Et scrisseno quello pareva a sier Zacaria Contarini; el qual li rispose non star a lui, ma scrivesseno a la Signoria illustrissima di questo etc.
     
      Di Milam, dil secretario. 0 da conto; che francesi de lì desiderano le conclusion di le trieve.
     
      [543] Di Goricia, di sier Zorzi Corner, el cavalier. Lauda sier Zustignan Morexini, provedador, ch'è solicito a quelle fabriche; e aricorda, la Signoria indusij a far in suo loco tanto el fenissa, che 'l finirà fin do mexi. Item, esser andà il signor Bortolo, con zente et 400 cavali lizieri, tra i qual molti stratioti, versso Postomia. Et che la rota fo 28 homeni et 40 cavali; et li capi tutti sta ben.