Item, che in quella matina, a dì 8, el partì esso missier Zuan Jacomo con le so zente, videlicet fato 4 squadroni di 4000 fanti et un squadron di 400 cavali lizieri e 3 squadroni di 400 cavali l'uno etc. Item, scrive l'ordine dato e le custodie lassate in li lochi, zoè Roverè, Agresta, Peneda et via discorendo, [544] ut in litteris: e che 'l si lieva e vien, con il resto dil campo drio, a la volta di Verona, dove l'aspeterà il suo colega e l'hordine di la Signoria nostra, e farà alozar le zente d'arme lì in veronese fin arà altro mandato.
     
      Di sier Zorzi Corner, el cavalier, provedador zeneral, di ..., date a Raitimber. Come, inteso il caso di la motion di todeschi contra quelli castelli, era venuto lì col governador e zente per seguirli. Li qualli sono domino Christoforo di Frangipanni, et uno capitanio regio e altri paesani.
     
      Di Cao d'Istria, di sier Etor da cha' Tajapiera, podestà et capetanio, di 7. Et manda uno aviso auto di Damian di Tarsia, castelan di Castelnuovo. Come i nimici erano venuti a Bren, castello soto Trieste, mia 8 di Castelnovo, et quello con focho brusato; adeo chi era dentro, per non brusarsi, ussite et fonno presi da' todeschi, videlicet sier Ferigo Contarini, quondam sier Nicolò, domino Hironimo da Sovergnan, patricio nostro, e altri homeni da conto, ut in litteris. Et cussì hanno brusato 3 altri castelli, e li homeni menati via presoni.
     
      Di sier Hironimo Contarini, provedador di l'armada, date in galia, a presso Fiume, a dì 5. 0 da conto; aspeta hordine di quello l'habbi a far.