[1508 06 10]A dì 10, fo la vezilia di Pasqua di mazo. Et la sera achadete un caxo molto strano et miserando, che fo conduto in questa terra il corpo di sier Hironimo Contarini, quondam sier Moisè, era stato provedador di l'armada fuora zà molti mexi, el qual si era anegato versso Lanzam, e rota la so galia, et cussì quella di sier Bernardim da cha' Tajapiera, sopracomito, per fortuna grandissima. Il modo, quando e come, scriverò di soto. Fo caxo zà molti anni non sequito un tal, et a tutta la terra si dolse.
     
      [1508 06 11]A dì 11, fo il zorno di Pasqua. Il principe a messa con li oratori in chiesia di San Marco. Et poi disnar colegio di savij.
     
      [1508 06 12]A dì 12. Fo trato il palio a Lio, justa il consueto. Et da poi disnar fo pregadi per quanto era ocorsso, che nostri havia auto il loco di Postoyna, come dirò di soto; et era opinion in colegio di renderlo, per esser tolto da poi la conclusiom di la trieva.
     
      Di Postomia, di sier Zorzi Corner, el cavalier, provedador zeneral, di X. Scrive, che essendo venuto, con le zente et il signor governador, lì, li inimici comparseno; et nostri li fonno a l'incontro, adeo essi fuziteno, e nostri, sequendoli fino al bosco, ne preseno alcuni etc. Or volendo nostri far da seno, quelli di Postomia si reseno, salvo l'aver lhoro e le persone; et cussì nostri introno in la terra. Scrive molte particularità esso provedador, ut in litteris. Et questa nova si ave prima per letere di Trieste.
     
      Di sier Zorzi Emo, provedador zeneral, date a Verona, a dì 10. Come lì era venuto, et mandato le zente a le stantie et posto li pressidij e custodie di fanti, come scrisse per avanti etc.